雖然我地去神戶的惟一目標就係食神戶牛，不過，在食牛之間的時間都唔可以冇嘢做嘅，所以，我地都好努力咁遊覽咗好多地方架﹗第一站，就搭車上咗去布引香草園睇薰衣草了。
我們首先搭地鐵到新神戶站，然後乘纜車上香草園。沿途風景不俗，在半途已可飽覽大半個神戶巿。
肥仔是一個非常黑心的人，明知道佢老婆仔即係我有少少畏高，連搭海洋公園纜車都會有少少腳軟，所以一坐上這山頂纜車後，便不停搞呢搞路，又話要開風扇，又話同我一齊坐（工作人員叫我地打對面坐，應該係要平衡啩），搞到我非常緊張。一陣又不停話風景好靚，叫我望下，一陣又大叫「嘩，好高呀」，又叫我抬高頭影相，其實那時我正襟危坐，慌死動作大d都會有事，仲邊敢周圍望周圍郁？後來參觀到尾聲時他不停暗自傻笑，我以為佢諗到今晚食乜餸諗到好開心，但佢死都唔肯講佢笑乜，經過我七摛七打七煎熬嘅嚴刑後，先講出真話：「唔係呀，我係諗到一陣落山時妳又要驚一輪那個好笑樣，所以預先開心咗。」嘩你地話呢d咁冇同情心嘅人係咪要打多兩鎚？
布引香草園賞花篇
這香草園的賣點就是一大片薰衣草園，但可惜我地來到太早，她們還含苞待放，莫講話看到一大片紫色嘅奇景，連半點有顏色嘅美景都冇，惟有睇下其他花花。終於明白，賞花係要有一點運，一點緣，強求不來的。
躲在溫室裏的兩個可愛小花王。
在神戶巿逗留的兩天，除了親親大自然的活動，當然還有文化活動啦，我地兩個好有內涵家嘛，梗係要去下美術館呀博物館呀扮下嘢咁架啦～～
當我地在酒店床上發呆，盤算緊神戶巿究竟有乜好想參觀時，肥仔突然話：「神戶有大地震架喎﹗」我：「咁，即係點？你想試下地震係點乎？」肥：「唔係呀，你記唔記得十年前神戶大地震，好似好嚴重死咗好多人喎﹗應該有類似甚麼館可以睇下地震資料喎﹗」我：「哦，咁睇下reception有冇有關單張啦﹗」心諗原來肥仔真係咁有求知慾喎，於是碌落去reception，咁啱又有張寫住「阪神淡路震災紀念館」的單張，咁我地順理成章就去咗參觀嘞。
日本人一貫做事認真有條理得非常過份，所以這紀念館的資料真係齊全得好緊要，從地震原理、防震工程、震災工作、災後救濟、重建過程，以及神戶巿人的心聲都一一盡錄，連當年地震停了的古老大鐘、燒熔成一堆的銀幣、在高熱高壓下嚴重變型的金屬等「重要證物」也擺放得整整齊齊，有埋中英日文解釋。整個紀念館從外到內的一切一切，令我感到那份有條理及仔細程度簡直好似講緊一件事不關己的事，如果你話呢個館係其他巿嘅人搞而唔係神戶巿嘅人搞我真係會信，因為，這地震唔簡單，真係將大半個神戶巿剷平咗架，今時今日見到嘅神戶巿好新簇簇d建築物好乾淨整齊，唔係因為神戶人特別有潔癖，而真係因為好新淨，十年樓齡可以有幾舊？一件咁傷痛嘅事，如果唔係好有理性好detach咁處理，點做到呢？所以，我真係好佩服日本人，佩服得嚟又有點驚。
在震災紀念館隔離，就係神戶巿最出名的藝術館--兵庫縣立美術館。這美術館收藏了不少本土及外國藝術品，而首先最吸引我地嘅當然係佢嘅外貌啦。這美術館係由日本著名建築家安藤忠雄設計，所以日本人話淨係個館都已經係一件藝術品，我地都非常同意。
你睇下，我地兩個盲毛拿著一部簡陋DC都可以影到咁有feel（自以為），就知道呢個建築物幾靚幾犀利。我地對建築一無所知，各方高人請指教下我地點樣欣賞哦～～
我地一場來到日本，冇理由只係睇西洋嘢，所以特別參觀了要俾多少少錢的特別展覽室，欣賞一下生於神戶巿的兩位著名日本畫家小磯良平和金山平三的作品。兩位畫家的風格當然好唔同，但他們畫西洋畫都畫得好到家好圓熟，有好幾幅作品都睇到好有feel，但點樣都搵唔到相，俾唔到大家睇添﹗惟有係咁咦擺兩張上嚟啦～～
小磯良平的作品
除了他們，還有另一個日本畫家的作品我們也很喜歡，就是版畫家川西英了。他其中最著名的作品系列就是「神戶百景」版畫，而我和肥仔不約而同最喜歡的一幅就是由黑、白、紅、灰四種顏色為主的「古道具屋」，可惜美術館gift shop竟然沒有這幅畫的有關物品發售，而在網上怎也找不到相，所以又俾唔到大家睇（嗱唔好話我廢啦，我都唔想架），惟有放兩張這系列的其他相片，都好靚架﹗
神戶駅前
神戶港
其實呢，話就話來到神戶淨係想食神戶牛，但我還有一個心願，就係去寶塚巿親身拜會手塚治虫大師嘅紀念館嘞。雖然由神戶巿去寶塚巿都路遙遙，而寶塚巿本身亦沒甚特別景點（em...暫時我都未識欣賞寶塚歌劇），但我都要在那裏留下一兩條腳毛嘅﹗
手塚治虫紀念館正門
未正式走到正門前，便有這個火之鳥銅像，想迷路都幾難。
正門前有一系列手塚治虫漫畫人物的手印腳印，這個就是秦博士的﹗
紀念館一共三層，館內陳設都算係咁上下，至少把大師的一生介紹得很清楚，連他小時候的日記、繪作手稿、最早期的漫畫也有，又有大師生前的生活點滴和訪問片段，仲有動畫短片睇。由後人搞紀念館，算係咁架啦。即係，資料齊全，但有冇大師嘅靈魂呢，就唔敢講。所以，我明白宮崎駿點解拿拿聲自己搞個美術館出嚟，因為至少個人嘅傳譯權落番自己度嘛。雖然如此，館內有不少得意detail，又幾窩心嘅﹗好似這電梯就有不少漫畫人物刻在上面，等候時間都有嘢睇下。
洗手間內瓷磚也有這些得意公仔，都幾好玩吖。
紀念館底層有一個工作室，俾大人小朋友用電腦自製動畫，都幾好玩架，睇下完全唔睇手塚治虫漫畫嘅肥仔都舞咗小飛俠一輪呀。
工作室的盡頭是模擬大師生前的studio一角，非常簡潔，書櫃上都是美術書，桌上就是鉛筆和畫紙，尚未有電腦繪畫的年代，大師就是如此畫畫畫，畫了一個大千世界出來，啟發不少動畫家，感動了不少成人心靈，亦給小朋友帶來無窮歡樂。Dear Tezuka Osamu, thank you very much!
