我和肥相公來上海咁耐（都係兩個月咁大把啫），似乎只係掛住食同玩，但事實上，我地其實不停咁探究這上海姑娘的底蘊，只係唔夠時間向大家報告而已﹗今次就講下我地在上海聽咗咩嘢音樂啦~~

不久前我地嘅好朋友兼JAZZ迷Nicky上來工幹，順道帶我地去聽JAZZ，得高人指引，我地去咗一個叫JZ Club嘅地方聽歌，據聞連教Nicky色士風嘅阿sir都話呢度正，因為呢度嘅樂手皆非業餘。

入面嘅布置都幾有mood嘅~~（但在樓上雅座大聲傾偈嘅客人就搞到樓下嘅人冇乜mood囉）

那裏每晚9時才開始有表演，上半場演出嘅係呢對二人組合，玩嘅都係流行jazz，中間會夾雜一些golden oldies。（Nicky和肥相公後來發現他們的playlist係唔變嘅，即係無論你點咩歌佢地都照番自己個songlist來玩，Nicky說這完全不是玩jazz那回事.......真是反高潮啊﹗）

下半場表演的就是這四人組合，他們玩的jazz實驗味比較濃，曲目偏向underground，亦很似流行歌手演唱會裏用來間場或讓樂隊過手癮而玩的session（即係在何韻詩Eason等人的演唱會裏特登俾時間一班樂隊jam歌然後個歌手叫大家俾掌聲佢地的那種session），這四人玩得甚投入，自娛自樂。美中不足的是，那位小提琴手的姣味實在太濃，那對電眼掃勻全場男士後竟然連我呢位師奶都唔放過，所以不止我身旁兩位男士頂唔順，連我呢d見慣大風大浪嘅都頂唔順呀陰公﹗

一不離二，後來主音出場，才知「姣中自有姣高手」﹗

別過jazz，我和肥相公某夜去咗上海音樂廳聽鋼琴表演，睇下呢位女鋼琴家，都幾清秀架﹗佢叫做小山實稚惠，係第一個在蕭邦鋼琴大賽獲名次的日本女鋼琴家。

上海音樂廳的檔次不及上海大劇院，但外型都幾唔錯，前身係南京大戲院，都算歷史悠久的建築物。

重新裝修的大堂，簡直跟外國的歌劇院一模一樣。都係果句，上海有好多好靚嘅地方，但總有點too good to be true的味道，靚得來總有點距離。聽罷音樂，更覺得外型雖然緊要，但內在同樣重要，希望有關方面撥款搞下啲acoustic........

好嘞，講番下音樂會嘅主角啦﹗其實呢，我地對呢位鋼琴家真係零認識，我地去聽古典音樂嘅動機都係好簡單，只要係想聽嘅曲目就去架啦（咁當然仲要睇下貴唔貴啦，下下幾百蚊一張飛真係會睇到破產的）﹗這晚我地聽嘅係拉赫曼尼諾夫嘅第二鋼琴協奏曲，我地兩個都非常鍾意這樂曲，計埋小山實稚惠小姐嘅版本，家裏都有五個不同鋼琴家嘅版本，真係百聽不厭﹗

據八級鋼琴嘅Edith話，拉先生呢首協奏曲係非常難彈，手掌唔夠大、姆指尾指指距唔夠長都唔慌彈得好，拉先生真係擺到明考後人牌﹗我仲好記得第一次聽嘅係Rubenstein嘅黑膠，諗住臨瞓聽d柔和鋼琴舒緩下神經，點知愈聽愈激動，真係好聽到喊咗出嚟，搞到成晚眼光光，撞鬼﹗當知道埋呢首樂曲係難度咁高之後，更加希望能現場欣賞。

不幸地，一直以來來港表演嘅拉先生鋼琴協奏曲都多數係三小姐，呢位二小姐始終不被鋼琴家所點選（但究竟係鋼琴家避重就輕而唔揀她還是她不夠受歡迎就真係不能肯定），搞到我和肥相公（其實肥相公份人就冇乜所謂）朝思夜盼，癡癡地等待肯露一手的高人。終於，俾我地盼到了﹗雖然係來到上海才遇到，但總好過遇唔到吖~~

其實，小山實稚惠小姐彈得有幾高水準，我真係唔識評，但我覺得好好聽，好感動（雖然都有少少走音位但瑕不掩瑜），聽到最後我真係忍唔住眼濕濕，好想企起身大聲咁多謝拉先生創作咗一首咁好聽咁偉大嘅樂曲出嚟，好想感激佢老人家為世界貢獻咗咁美好嘅音樂﹗每次聽到咁好聽嘅音樂表演，我都覺得自己好幸福，覺得上天又恩賜咗一啲好好嘅嘢俾我，所以我不時會開心到想喊，但為怕嚇親人，我都係化眼淚為掌聲。出盡吃奶嘅氣力拍掌歡呼，係作為一個觀眾最應該做嘅事。

小山實稚惠小姐謝幕時，我牛咁眼咁望住佢雙手，原來，真係好大對呀﹗仲有，她雙臂都好雄渾有力架﹗如果唔係，點應付到拉先生嘅二小姐？二小姐嘅第一和第三樂章都有唔少「蝦人位」，奀挑鬼命嘅人一定唔使旨意達標，我見到小山實稚惠小姐都彈到就嚟抽筋，所以更加應該俾多d掌聲﹗

希望嚟緊有機會聽更多音樂會，我好想現場聽蕭邦嘅grande polonaise同埋新年除夕夜可以現場聽貝九，咁就哈利路亞感謝主了﹗