大家好﹗我叫冬冬，係曲架仔，仲有三個月就一歲仔啦﹗剛剛過去嘅周日，我主人Connie帶咗兩個朋友來同我去佘山玩咗一日，搞到我鬼死咁攰呀﹗汪汪﹗
呢，咪呢兩個人囉﹗佢地好鬼熱情架，上次來我家第一次見面已經好想抱抱錫錫，但我好慢熱家嘛，梗係唔俾啦﹗不過見佢地好似好好人，又好鍾意狗狗，兼且今日都第二次見佢地，咁我就係咁咦陪佢地玩，順便做佢地嘅導遊啦﹗
佘山係離巿中心大約1.5至2小時車程嘅郊區，果度有一間度假酒店，附近仲有教堂仔，同埋好多片大草地、公園俾我地同小朋友玩架﹗你地見我走來走去咁happy就知我好鍾意呢度啦﹗
雖然我好怕水，而且上次來玩仲唔小心跌落水，但我又好鍾意飲架喎，gugugugugu......
由於我好奇心太旺盛啦，見到陌生人我都好鍾意搞佢地，所以主人每見到有好多行人走來時，都會幫我戴上狗鍊，費事我嚇親人。其實我咁可愛，邊有嚇親人喎？唔好話d人細膽？
主人鍾意同我玩飛碟，我一見到隻飛碟飛飛下就會一支箭咁撲過去，然後好開心咁據為己有，舐下舐下又聞下聞下咁啦，唔知點解主人成日都叫我拎返過去俾佢喎﹗唓，又係佢掟過嚟俾我，跟住又要我拎返俾佢，玩我咩？所以我好少理，一於等主人走過來自己攞返再掟過~~
呢間小教堂係可以舉行婚禮架﹗係咪都唔錯呢？咦，我見到有個好可疑嘅人企响度唔知做咩喎﹗唔通係壞人？等我凶下佢先.......胡胡胡胡胡胡......
下......？我只係胡下陌生人（ok，仲跑咗埋去狂吠一輪），點解要鬧我喎？我都係想保護妳之嘛﹗
別過渡假酒店，我地下一站就係去佘山天主教教堂，遠望埋去都幾恐怖架﹗仲要加上今日天陰陰添......
雖然今日好凍又有雨，但我地都一鼓作氣咁行上山頂（其實唔使半小時就上到去）。
中途仲有呢D雕像睇添﹗點解果個人有對翼，呢個又冇冀嘅呢？其實有翼果個係咪雀仔？
近距離睇呢個教堂都幾靚架，我聽佢地幾個講話好似歐洲嘅敎堂咁喎（歐洲係咩黎？）
呢個肥朋友聲稱自己打籃球受傷，所以行得零舍慢，上到山頂仲扯蝦添﹗
睇下敎徒幾虔誠﹗咦，點解佢地要放火燒嘢呀？係咪玩戶外燒烤？
我地終於來到教堂門口了，據說呢個都係受保護建築物，好似都有好耐歷史喎。
我就冇得入去玩，所以托咗靚姐姐幫我影相，嘩，入面都真係幾靚哦﹗
今日仲有人影結婚相添﹗
唔知點解果兩位朋友見到山下景色會咁大反應，嘩嘩聲咁，又話嚟咗上海幾個月第一次見到山，乜原來上海冇山架？
估唔到响山頂都見到同類喎，咁梗係打個招呼啦﹗
嗦嗦嗦嗦嗦嗦嗦嗦嗦嗦嗦嗦嗦嗦嗦嗦嗦嗦嗦嗦嗦嗦嗦嗦嗦......
咁say完hi，就梗係say bye啦，呢d咪叫hi-bye friend囉﹗
唔知點解今日零舍興奮，見親陌生人都走埋去搞一輪，結果又俾主人鬧啦﹗仲要夾住我個嘴來鬧呀陰公，痛痛痛......
開心，係要付出代價的，主人話今日落雨濕濕我就特別污糟，所以就帶咗我去我最討厭嘅地方－－寵物店沖涼﹗Yuck﹗
睇下，成身濕立立好肉酸好唔舒服家嘛﹗仲要幫我戴個咁「唷炳」嘅口罩﹗
哇哇哇﹗使唔使三個人馬住我呀？？？吹咁耐架？好煩呀你地﹗
噓﹗終於吹乾晒﹗剪埋腳甲就走得，大家見到我一臉不耐煩就知我有幾鍾意呢度啦﹗下次請我都唔嚟呀﹗哼﹗
