由我地未上嚟上海已經話要上嚟一齊玩、到我地上咗嚟三個幾月先見人嘅阿姨姨丈，終於趕及在07年尚未遠去之時「交人」，好等我地可以一齊送舊迎新，算你地乖啦﹗拿，其餘尚未來上海報到嘅家庭成員，家陣上映少少精華片段俾你地過下癮，至於現場實況有幾好玩，你地只可以估下估下咯~~~

阿姨姨丈認真有旅遊運，一上到嚟上海就放晴，仲要係由朝曬到晚果隻大晴天喎，跟之前成個禮拜都陰天落雨真係天堂與地獄嘅分別。不過，佢地亦遇上上海最凍嘅日子，最低試過零下二度，不過阿姨姨丈似乎「老皮老肉」，百毒不侵，完全唔將寒冷天氣放在眼內，反而係我地兩個後生嘅不停咁「雪雪」聲度日，一有暖氣地方就竄入去，正牌係「後生打壞」。

阿姨姨丈一場來到，我地點敢待慢老人家呢？梗係拿拿聲在我地認為好食嘅地方訂位啦，包括去翰林軒飲茶、舊吉士和蘇浙匯吃晚飯等。仲計埋晒每日行程、景點唔好悶親佢地，以為自己好體貼，點知千計萬計就計漏咗一樣嘢，就係原來我地已融入咗上海人生活，完全忘記咗香港人係唔鍾意行路嘅﹗當我同肥相公話「兩個街口，好快到」，然後一支箭咁行行行嘅時候，原來阿姨姨丈在後面已行到扯晒蝦﹗所以，原本每日三個景點嘅行程，最後變咗一個景點加食、坐、按腳，好彩阿姨姨丈都收貨，原本100分嘅行程都總算有番99分啦，哇哈哈~~

除夕晚我地去咗舊吉士食飯，圖中兩位男士（左為肥相公，右為其難兄難弟同事Max黃先生）不知為何被淋得一頭上海老酒，無奈之餘還要陪笑，真係放咗工都仲要做嘢架﹗

我地一行五人中，有三個都係酒鬼，所以，酒，先係除夕夜飯嘅主角。在紅酒留後花雕又好貴嘅情況下，我地就點咗石庫門老酒送飯。當「喝酒從來不嚕囌」的姨丈及「酒之黑洞」嘅阿姨遇上「飲酒如飲水」嘅麥斯黃先生的時候，石庫門酒當然係瞬間消失，一支接一支咁上枱。無獨有偶，當我地高叫「來多支黑牌石庫門」時，隔離一枱靚女亦緊接大叫「來多支紅牌石庫門」，數量與頻率係同我地叮噹碼頭。雖然酒逢知己千杯少，但我地亦不能貿貿然借酒搭訕的，就在此時，麥斯黃先生突然把視線轉移到另一枱人客，並跟某男客人「相認」，然後拿住酒杯就去同人敬酒，於是兩枱人開始互相敬酒並互祝新年快樂，飲到酒酣耳熱嘅食客已經因為愈來愈接近倒數而情緒高漲。由於舊吉士樓上只得幾張枱，少少騷動都好快蔓延開去，所以此時那枱靚女客亦加入敬酒行動。一眾男士眼見機會嚟到，當然拿拿林拎起酒杯向靚女敬酒兼搭訕啦﹗於是「乾杯」、「喝」、「新年快樂」之聲此起彼落，大家飲酒好似飲水咁，真係正如某黃酒嘅廣告標語話齋：「上海沒有陌生人」﹗

咁，究竟係邊個將上海老酒淋兩位男士頭上？大家睇睇下列事發經過連環圖，或者會自有分曉﹗

在慘劇發生之時，我只聽到幾把男聲激動地叫「邊個淋我？」最後當然係謎團一個，因為你推我、我推你，個個都話自己被人淋，賊喊捉賊，笑作一團﹗

在阿姨姨丈臨返港前一晚，我地去咗聽聞好好食嘅蘇浙匯。

             熏魚                     鎮江肴肉                        羊腩煲 

用小饅頭夾着吃嘅樟茶鴨都係第一次。

個人認為夾唔夾來吃嘅分別唔大。

    蟹肉西蘭花                     白灼蝦                        無錫骨

    阿姨至愛炒年糕           姨丈至愛蒸魚

蘇浙匯嘅菜係幾唔錯，價錢亦好合理，環境仲好適合招呼貴賓，不過，兩者比較，我都係鍾意去舊吉士食飯多啲，但由於上海菜始終好濃味，久唔久吃一餐就非常好﹗